RIPOTA PANORAMA, RUKWA
MZEE mwenye umri wa miaka 72 aliyefahamika kwa jina la Paul Kisiwa, mkazi wa Kijiji cha Ng’ongo ameuawa kwa kupigwa rungu kichwani.
Mzee huyo aliuawa Machi 3, mwaka huu majira ya jioni katika Kijiji cha Kifinga kilicho Kata ya Mtowisa wilayani Sumbawanga.
Tukio hilo limethibitishwa na Kamanda wa Polisi wa Mkoa wa Rukwa, George Kyando ambaye amesema watu sita akiwemo mjukuu wa mzee huyo wanashikiliwa na polisi wakituhumiwa kupanga mauaji hayo.
Kamanda Kyando alisema mjukuu wa mzee Kisiwa ambaye hakumtaja jina alikubali kuchukua Sh. Milioni moja ili babu yake auawe.
Diwani wa Kata ya Mtowisa, Edger Malinyi naye amekaririwa akieleza kuwa mzee huyo ambaye alikuwa Mwenyekiti wa Kata wa Chama Cha Mapinduzi (CCM) alizikwa kimya kimya shambani kwake baada ya kuuawa.
“Taarifa za kupotea kwa Kisiwa zilianza kuzagaa. Ndugu na jirani zake wakishirikiana na polisi walianza kumtafuta ilipofika Machi 8, mwaka huu walimbana mjukuu wake ambaye alikiri kupanga njama za kumuua babu yake baada ya kupewa Sh. 1,000,000. Alipobanwa alieleza kuwa alipanga njama za mauaji hayo na watu waliokuwa na mgogoro wa ardhi wa muda mrefu na babu yake.
“Kwamba babu yake aliwakodishia watu hao shamba la ekari zaidi 15 kwa ajili ya shughuli za kilimo lakini baadaye aliwanyang’anya akaanza kulilima mwenyewe ndiyo wakakasirika wakaandaa mpango wa kumuua.
“Siku ya tukio la mauaji walimvamia akiwa shambani kwake, wakampiga na rungu kichwani ambalo lilimuua papo hapo.
“Baada ya kumuua, walichimba shimo shambani humo wakamzika ili kupoteza ushahidi. Mjukuu wake alionyesha mahali alipozikwa na polisi walipofukua waliukuta mwili wa mzee huyo,” alisema diwani huyo.
