RIPOTA PANORAMA – 0711 46 49 84
KAMPUNI ya Mohamed Enterprises Tanzania Ltd (MeTL) inayomiliki mashamba ya mkonge yaliyoko Mkoa wa Tanga, bado haijatekeleza agizo la Serikali la kuyaendeleza kwa takribani miezi minne sasa.
Disemba 8, mwaka jana MeTL ilipewa siku 24 na Serikali kuyaendeleza mashamba hayo yenye ukubwa wa hekta 9,418 ambayo miongoni mwake hayajaendelezwa na badala yake yamegeuka kuwa pori.
Agizo hilo lilitolewa na Naibu Waziri wa Nyumba na Maendeleo ya Makazi, Angelina Mabula akiwa katika ziara ya kikazi mkoani Tanga na kubaini kuwa MeTL iliendeleza baadhi ya mashamba hayo baada ya kupata ilani ya kutaka kunyang’anywa.
Taarifa kutoka kwa baadhi ya viongozi wa sekta ya katani zinaeleza kuwa agizo la Serikali lililotolewa na Naibu Waziri Mabula halijatekelezwa tangu mwaka jana ingawa kampuni hiyo iliandika barua serikalini ikieleza namna itakavyotekeleza kwa awamu uendelezaji huo.
Mbunge wa Korogwe Vijijini (CCM), Stephen Ngonyani maarufu kwa jina la Profesa Majimarefu ambaye aliambatana na Naibu Waziri Mabula katika ziara yake hiyo ya mwaka jana, alieleza kuwa MeTL ilimilikishwa mashamba hayo mwaka 2000 lakini tangu wakati huo ilishindwa kuyaendeleza kikamilifu.
Baada ya agizo hilo la Serikali, Ngonyani aliishukuru Serikali kwa kuiona kero ya ardhi jimboni kwake.
Tayari Serikali imekuwa ikichukua hatua mbalimbali za kuyarejesha kwa wananchi mashamba ambayo hayajaendelezwa na wawekezaji ambao baadhi wanadaiwa waliyatumia kuchukulia mikopo benki lakini waliitumia kwa shughuli nyingine.
