Washington, Marekani
Rais wa zamani wa Marekani, Donald J. Trump, ametoa ufafanuzi kufuatia picha aliyochapisha katika mtandao wake wa TRUTH, ambayo imezua mjadala mkubwa miongoni mwa watumiaji wa mitandao ya kijamii.
Picha hiyo iliyoonekana kuhusisha taswira ya kidini iliwafanya baadhi ya watu kuamini kuwa Trump alikuwa akijilinganisha na Yesu Kristo, jambo lililosababisha hisia tofauti na ukosoaji kutoka kwa baadhi ya waumini wa dini ya Kikristo.
Akizungumza na waandishi wa habari, Trump alikanusha tafsiri hiyo akisema kuwa watu wengi wamekosea kuelewa ujumbe wa picha hiyo. Alisisitiza kuwa hakumaanisha kujifananisha na Yesu, bali alijiona kama daktari katika taswira hiyo.
“Ni kweli nilichapisha picha hiyo, lakini nilijiona kama daktari nikihudumu, siyo Yesu kama watu walivyodhani,” alisema Trump.
Aidha, aliongeza kuwa hakutarajia picha hiyo kuchukuliwa kwa uzito mkubwa kiasi hicho, akieleza kushangazwa na jinsi ilivyozua mjadala mpana.
Kauli hiyo imekuja wakati mjadala kuhusu matumizi ya picha na ujumbe wa viongozi kwenye mitandao ya kijamii ukiendelea kushika kasi, huku wachambuzi wakisisitiza umuhimu wa tahadhari katika mawasiliano ya umma.
Imeandaliwa na Razaki Mkuluma
