TEHRAN, Iran
SPIKA wa Bunge la Iran, Mohammad Bagher Ghalibaf, amesema nchi yake itakuwa tayari kwa mbinu mpya za kivita endapo utakosekana mwafaka katika mazungumzo ya amani na Marekani.
Kesho Aprili 22, 2026 ndiyo siku ya mwisho ya kile kilichokubaliwa kuwa ni wiki mbili za kusitisha mapigano.
Pande mbili hizo zilikubaliana kusitisha vita ili walau kutoa nafasi ya mazungumzo ya kusaka suluhu katika mgogoro huo unaofukuta Mashariki ya Kati.
Hata hivyo, mazungumzo yaliyofanyika siku chache mjini Islamabad, Pakistan, hayakuzaa matunda, huku kila upande ukiushutumu mwingine kwa kuweka misimamo mikali.
Kwa sasa, zipo jitihada za kufanikisha mazungumzo mengine, ingawa bado kumekuwa na mvutano unaotishia uwezekano wa kutokufanyika.
Viongozi wa Iran wamesema mara kadhaa kuwa hawatoshiriki kwa kuwa Marekani haina nia ya dhati ya kupata maridhiano kutokana na aina ya masharti inayotoa.
