CARACAS, Venezuela
SHIRIKA la Fedha la Kimataifa (IMF) na Benki ya Dunia (WB), zimeanza tena uhusiano wa kifedha na Venezuela, hatua itakayoiwezesha nchi hiyo kuanza kupokea msaada kutoka taasisi hizo za kimataifa.
IMF na WB zimeeleza kuwa uamuzi huo umetokana na kuridhishwa na mwelekeo wa uongozi wa sasa chini ya Rais wa mpito, Delcy Rodríguez, pamoja na mabadiliko ya kisiasa yanayoendelea nchini humo. 
Hatua hiyo imekuja baada ya takribani miaka saba tangu taasisi hizo zilipositisha ushirikiano na Venezuela mwaka 2019, kufuatia mgogoro wa kisiasa uliosababisha kutokutambuliwa kwa serikali ya wakati huo iliyoongozwa na Nicolás Maduro. 
Wakati huo, IMF na Benki ya Dunia ziliamua kuutambua upande wa upinzani uliokuwa ukiongoza Bunge la nchi hiyo, hali iliyosababisha kusimama kwa misaada na mikopo ya kifedha.
Kwa mujibu wa taarifa hizo, kurejea kwa ushirikiano huo kunatarajiwa kufungua njia kwa tathmini ya uchumi wa Venezuela, uwezekano wa kupata mikopo mipya, pamoja na kusaidia juhudi za kurekebisha deni la taifa hilo. 
Venezuela ni mwanachama wa Benki ya Dunia tangu mwaka 1946, lakini mara ya mwisho kupokea mkopo kutoka taasisi hiyo ilikuwa mwaka 2005.
Imeandaliwa na Hassan Mwacha
