MAELFU ya familia nchini Sudan bado wanalazimika kuyakimbia makazi yao, miji na hata mipaka ya nchi kufuatia vita vilivyoanza kusambaa mwezi Aprili 2023.
Licha ya kupita kwa takribani miaka mitatu tangu kuanza kwa mzozo huo, idadi kubwa ya wananchi bado wanaishi katika hali ya kuhama hama wakitafuta usalama, huku wengi wakikosa makazi ya kudumu.
Kwa mujibu wa utafiti wa hivi karibuni uliofanywa na Baraza la Wakimbizi la Norway, uliowahusisha kaya 1,293 zilizokimbia makazi yao ndani ya Sudan na katika nchi jirani za Chad na Sudan Kusini, hali ya maisha ya waathirika inaendelea kudorora siku hadi siku.
Ripoti inaeleza kuwa familia nyingi zimejikuta katika mzunguko usioisha wa kupoteza mali zao kila wanapolazimika kuhama, hali inayozidi kufifisha matumaini ya kurejea katika maisha ya kawaida.
Takwimu zinaonyesha kuwa takribani asilimia 90 ya watu hao wamepoteza makazi yao, huku karibu robo tatu wakikosa kabisa chanzo cha kipato.
Aidha, hali ya upatikanaji wa chakula imefikia kiwango cha kutisha, ambapo zaidi ya asilimia 80 ya kaya nchini Sudan hulazimika kuruka milo mara kwa mara.
Imeandaliwa na Razaki Mkuluma
About The Author
