Mkuu wa Wilaya ya Handeni, Mhe. Salum Nyamwese, amefanya kikao maalum cha maandalizi ya mapokezi ya Mwenge wa Uhuru 2026, kikilenga kujadili namna bora ya kuupokea na kuuenzi Mwenge wa Uhuru katika Wilaya ya Handeni.
Katika kikao hicho, imeelezwa kuwa Mwenge wa Uhuru unatarajiwa kuwasili tarehe 18 Juni 2026 katika Halmashauri ya Mji wa Handeni na tarehe 19 Juni 2026 katika Halmashauri ya Wilaya ya Handeni.
Akizungumza katika kikao hicho, Mhe. Nyamwese amesema kuwa Mwenge wa Uhuru si mgeni kwa wananchi wa Handeni bali ni alama muhimu ya Taifa, inayobeba ujumbe wa mshikamano, maendeleo na matumaini kwa Watanzania wote.
“Mwenge wa Uhuru ni alama na tunu ya Taifa letu. Unamulika, unaelimisha, kuhamasisha maendeleo ndani na kutoa matumaini ndani na nje ya mipaka ya nchi,” amesema DC Nyamwese.
Aidha, amewataka viongozi na watendaji wote kushirikiana kikamilifu kuhakikisha maandalizi yote yanakamilika kwa wakati ili Wilaya iweze kuupokea Mwenge wa Uhuru kwa mafanikio makubwa.
Kaulimbiu ya Mbio za Mwenge kwa Mwaka 2026 inasema “Tanzania ni Yetu Sote, Tushikamane kwa Pamoja Kuleta Maendeleo”
About The Author
