TANGU George Mpole alipotwaa tuzo ya Mfungaji Bora Ligi Kuu Bara mwaka 2022, hakuna mchezaji mzawa aliyeweza kufanya hivyo hadi sasa, lakini kiungo wa Azam, Feisal Salum ‘Fei Toto’, huenda akaivunja rekodi hiyo msimu huu.
Fei Toto ndiye kinara wa mabao kufikia hatua hii ya msimu wa 2025-26, akiwa ameingia kambani mara 10, achilia mbali ‘asisti’ zake saba.
Itakumbukwa, Mpole akiwa na Geita Gold, alifunga mabao 17 alipotwaa kiatu cha ufungaji bora msimu wa 2021-22, wakati huo Fei Toto akiwa amezifumania nyavu mara sita pekee.
Tangu wakati huo, wachezaji wa kigeni wamekuwa wakipokezana tuzo hiyo, huku washambuliaji wazawa wakiishia kuwa wasindikizaji tu.
Mastaa wa kigeni walioibuka wafungaji bora kwa misimu mitatu mfululizo ya hivi karibuni ni pamoja na Ahoua wa Simba aliyefanya hivyo msimu uliopita (2024-25) akiwa na mabao 16.
Wengine ni Stephanie Aziz Ki (mabao 21, 2023-24) na Fiston Mayele (mabao 16, 2022-23), wote wakipata heshima hiyo wakiwa na Yanga.
Msimu wa 2023-24, Fei Toto alikaribia kuwa mfungaji bora wa Ligi Kuu Bara lakini mabao yake 19 hayakutosha mbele ya Aziz Ki aliyebeba tuzo hiyo kwa tofauti ya mabao mawili.
