Rais wa Kenya, William Ruto, amewasili nchini kwa ziara ya kikazi ya siku mbili yenye lengo la kuimarisha uhusiano wa kidiplomasia na kiuchumi kati ya Tanzania na Kenya.
Rais Ruto anatarajiwa kufanya mazungumzo na mwenyeji wake, Rais Samia Suluhu Hassan, leo Mei 4, 2026, Ikulu jijini Dar es Salaam, ambapo viongozi hao watajadili masuala mbalimbali ya ushirikiano wa pande mbili.
Baada ya mazungumzo hayo, Rais Samia na Rais Ruto wanatarajiwa kushiriki katika Jukwaa la Biashara litakalowakutanisha wafanyabiashara na wawekezaji kutoka nchi hizo mbili, kwa lengo la kuimarisha biashara na uwekezaji wa kikanda.
Mapema kesho, Mei 5, 2026, Mheshimiwa Ruto atalihutubia Bunge la Jamhuri ya Muungano wa Tanzania jijini Dodoma kabla ya kuhitimisha ziara yake.
