Waziri Mkuu, Mwigulu Nchemba, amekagua maendeleo ya Mradi wa Uboreshaji Huduma ya Maji wa Mji wa Manyoni unaotekelezwa kwa gharama ya shilingi bilioni 28, huku akipongeza jitihada za wananchi wa wilaya hiyo katika kuendeleza kilimo cha korosho na kuhimiza uwekezaji katika viwanda vya kuongeza thamani ya mazao.
Akiwa katika ziara ya kikazi mkoani Singida leo Mei 30, 2026, Waziri Mkuu ametembelea mradi huo wa maji na kupokea taarifa kutoka kwa Mkurugenzi Mtendaji wa Mamlaka ya Majisafi na Usafi wa Mazingira Manyoni (MAUWASA), Mhandisi Lucas Mwinuka, ambaye alisema mradi umefikia asilimia 80 ya utekelezaji na unatarajiwa kukamilika Agosti 10, 2026.
Kwa mujibu wa taarifa hiyo, mradi unahusisha uchimbaji wa visima vya maji, ujenzi wa kituo cha kusukuma maji, tanki la kuhifadhi lita milioni mbili za maji pamoja na ulazaji wa mabomba ya kusambaza huduma kwa wananchi. Mradi ukikamilika utaongeza uzalishaji wa maji kutoka lita milioni 2.057 kwa siku hadi lita milioni 6.48 kwa siku na kuwahudumia zaidi ya wakazi 64,667 wa mji wa Manyoni.
Naibu Waziri wa Maji, Kundo Andrea Mathew, amesema mradi huo ni sehemu ya utekelezaji wa Ilani ya CCM na juhudi za Serikali ya Awamu ya Sita chini ya uongozi wa Samia Suluhu Hassan za kuhakikisha wananchi wanapata huduma ya maji safi na salama. Aliongeza kuwa mradi huo ni sehemu ya kifurushi cha nne cha Mradi wa Miji 28 unaotekelezwa kwa gharama ya zaidi ya shilingi bilioni 142.
Katika hatua nyingine, Waziri Mkuu amekagua Mradi wa Mnyororo wa Thamani wa Korosho kupitia Kiwanda Darasa cha Kubangua Korosho (KIDAKUKO) kinachosimamiwa na CAMARTEC katika eneo la Masigati wilayani Manyoni.
Akizungumza katika ziara hiyo, Dkt. Mwigulu amewapongeza wakulima wa Manyoni kwa kuanza kulima korosho kwa mafanikio na kuwa miongoni mwa waasisi wa zao hilo katika Mkoa wa Singida. Alisema Serikali imeweka mazingira wezeshi ya kukuza uchumi wa viwanda na kuongeza thamani ya mazao ya kilimo, huku akiwahimiza vijana, sekta binafsi na wawekezaji kutumia fursa zilizopo kuanzisha viwanda vya kuchakata korosho na mazao mengine.
Amesema korosho ni miongoni mwa mazao mbadala muhimu yanayoweza kusaidia kuimarisha uchumi wa wananchi na taifa kutokana na mabadiliko ya masoko ya mazao mbalimbali duniani, na kusisitiza umuhimu wa kuwa na mazao mengi ya biashara ili kukabiliana na changamoto za soko.
Kwa upande wake, Kaimu Mkurugenzi Mkuu wa CAMARTEC, Mhandisi Godfrey Mwinama, amesema Kiwanda Darasa cha Kubangua Korosho cha Masigati kilijengwa kwa gharama ya shilingi milioni 637.5 na kuzinduliwa rasmi Septemba 30, 2025. Alifafanua kuwa kiwanda hicho kimeanzishwa kwa lengo la kutoa mafunzo ya ubanguaji na uchakataji wa korosho kwa vijana, wanawake na wawekezaji, kikiwa na uwezo wa kufundisha watu 50 kwa wakati mmoja na kubangua kati ya tani 1.36 hadi tani 2.72 za korosho kwa siku kulingana na kiwango cha uzalishaji.
Ziara ya Waziri Mkuu imeonyesha msisitizo wa Serikali katika kuboresha huduma za maji pamoja na kuimarisha sekta ya kilimo na viwanda ili kuchochea maendeleo ya kiuchumi na ustawi wa wananchi.
About The Author
