Katika kuendeleza jitihada za kupambana na ugonjwa wa malaria nchini, Halmashauri ya Wilaya ya Handeni kwa kushirikiana na Wizara ya Afya imefanya mkutano maalumu kwa ajili ya utekelezaji wa Mpango wa Ugawaji wa Vyandarua Ngazi ya familia bila malipo.
Mkutano huo umefanyika leo Aprili 29, 2026, katika ukumbi wa mikutano wa hospitali ya Halmashauri, ukihusisha wadau mbalimbali wa sekta ya afya wakiwemo wataalamu, watendaji wa serikali na viongozi wa dini.
Akizungumza katika mkutano huo, Mkurugenzi Mtendaji wa Halmashauri ya Wilaya ya Handeni, Ndg. Saitoti Stephen, amesema kuwa ugawaji wa vyandarua bure ni mkakati muhimu katika kupunguza maambukizi ya malaria na kulinda afya za wananchi, hasa makundi yaliyo hatarini kama watoto na wajawazito.
Aidha, amewataka watendaji wa vijiji na kata kuhakikisha kuwa vyandarua vinawafikia walengwa wote kwa wakati na vinatumika ipasavyo kwa lengo lililokusudiwa, ameonya dhidi ya matumizi mabaya ya vyandarua, akisisitiza kuwa vinapaswa kutumika kulinda afya na si kwa shughuli nyingine zisizohusiana.
Kwa upande wake, Mratibu wa Kampeni ya Ugawaji Vyandarua Ngazi ya Kaya bila Malipo kutoka Wizara ya Afya, Bw. Wilfred Mwafongo, amewahimiza viongozi wa dini kushiriki kikamilifu katika kutoa elimu kwa jamii kuhusu umuhimu wa matumizi sahihi ya vyandarua katika kuzuia malaria, amesema ushiriki wa viongozi hao ni muhimu kwa kuwa wana nafasi kubwa ya kuifikia jamii kwa urahisi.
Hatahivyo Bw. Mwafongo ameongeza kuwa jumla ya vyandarua 224,339 vinatarajiwa kusambazwa kwa kaya 112,556 ndani ya Halmashauri ya Wilaya ya Handeni ambapo zoezi hilo ni sehemu ya mkakati wa kitaifa wa kutokomeza malaria na litasaidia kwa kiasi kikubwa kupunguza maambukizi na madhara yatokanayo na ugonjwa huo.
