Kila mahali ni mikito, watanzania wanakita na kukitwa. Wanakitana wanasiasa kwa staili ya upekepeke wakigombea ulaji. Wanakitana wanataaluma kila mmoja akitaka kuonyesha usomi wake hata kama ni kihiyo na watu wa Mungu nao wanakitana kwa staili mpya ya nikikita ninakitwa na nikiikita, ninaikita.
Kwa staili hii ya kita nikukite, wanafanya dhambi ya kukitana ambayo mtikisiko wake husababisha maangamizi kwa jamii nzima; na kwa sababu ya uzito wa mitikisiko ya mikito hutikisa huku na kule pasipo kikomo, wanaotikisika hukosa fursa ya kujikita sawia ili wasitikiswe na mikito hadi wanapokuwa wamekitwa na kuangamia.
Huangamia kwa kujikita katika imani ambayo ikikitwa, inatikisika.
Wote hawa wanakitana kiimani, wanakitana kutetea imani wasizojua chimbuko lake. Walizaliwa wakasadikishwa kuamini pasipo kuona. Ni vipofu waliopofuliwa na imani ya kusadikika, walisadikishwa kuamini kuwa imani yao ni mbaya wakaamini wakasadikishwa kuamini uzuri wa imani za kigeni.
Hawa ni wale wanaoamini katika kaswida na mapambio, wanadhani umahiri wao wa kuimba kwa sauti kubwa kaswida na mapambio ndiyo liwazo tosha la mioyo yao linaloweza kulegeza ukakasi wa dhambi ya kuendekeza udini waliorithishwa mababu wa babu zao na wageni waliokuja kuwatia upofu ili wasiione nchi ya ahadi.
Dhambi ni dhambi, hakuna dhambi kubwa wala ndogo. Kuzini na kuiba zote ni dhambi, kuchinja au kuponda kichwa kwa nyundo yote ni matendo ya kuua ambayo bwana mkubwa hayapendi.
Wapumbavu wanaokita na kukitwa wamejikitika kutenda dhambi ya kujikunyata katika mbawa za udini wakiamini kuwa dhambi hiyo hukumu yake ina ahueni mbele ya bwana mkubwa. Wanatenda kosa la kiimani na hukumu yao imeanza kutolewa hapa hapa duniani.
Kwa sababu ya upumbavu wao wa kujikita katika imani pasipo kuikita, badala ya kuchinja wanyama sasa wanachinjana wao kwa wao. Watu wanaoihubiri imani wasiokuwa na imani. Wadhambi waliojivika joho la utume wa kuipigania imani wasiyoijua, imani iliyoletwa na wageni. Imani ya kuiga sasa inawaangamiza.
Hakuna mtanzania ambaye asili ya babu wa mababu zake ilijikita katika imani ya kaswida au mapambio. Sote tu wajukuu wa wapagani ambao imani yao haikujikita katika kujichija au kuchijiwa.
Mungu hakuutumba ili tuuane, bali tuzaane na kuongezeka ili tuujaze ulimwengu lakini sisi tumeasi agizo lake kwa kuiga utamaduni wa kigeni wa kuamini kaswida na mapambio. Mafundisho ya wageni waliyotuletea ili kutupofua tujiangimize bila kuona.
Dhambi hiyo sisi tumeitenda, tumejibagua kwa dini zetu, hawa wanakaswida na wale wanapambio na waasisi wa dhambi hii ndiyo wanaotutawala. Waliiasisi huku wakijua kuwa itatumaliza lakini kwa sababu ya tamaa yao ya madaraka, waliiumba ikajiumba, tukaipokea, ikakaa kwetu, imetuzoea na sasa inakaa nasi.
Wakiwa madarakani, ubaguzi umeota mizizi kwa msaada wa ahadi ya upendeleo walioyoitoa. Hawawezi kuuzuia kwa sababu waliukaribisha, sasa wanajaribu kuupunga hewani lakini haupungiki.
Chuki inayojengwa katika msingi kuwa sitisho hilo ni shinikizo la wanamapambio imeota mizizi. Wanandugu wanaobaguana kwa imani za kidini wanawindana kwa majambia kwa kadiri ya mafundisho ya dini za kigeni. Sasa wanaangamizana kutokea visiwani.
Kwa sababu ya kuendekeza imani za kigeni, wanaoamini katika kaswida wanashinikiza watambuliwe kuwa wao tu, wapo peke yao, ndiyo wenye uhalali wa kuchinja kwa sababu tendo hilo limehalalishwa katika imani waliyorithishwa na wageni.
Kwa staili ile ile ya wanakaswida, kundi la wanamapambio linalokitwa lisichinje limejikita kulilia uhuru wa ruhusa ya kuchinja, halitaki kichijiwa, kisa imani ambayo msingi wake ni ubaguzi.
Watawala walioutafuta utawala kwa mahubiri ya ukabili ambayo mtoto wake ni udini wameshindwa kuwaepusha watawaliwa na adhabu ya mauti kwa kosa la kutenda dhambi ya ukabila. Wanayo misahafu iliyoandikwa na mababu zetu ikieleza misingi ya kufuatwa katika kuuishi utanzania lakini wameshindwa kuitumia.
Wote wanajua kusoma na kuandika. Wanasoma ndani ya mistari ya misahafu hiyo na hawaoni mahali palipoandikwa ni kundi lipi kati ya haya yaliyojikita kuamini imani za kigeni linalopaswa kujicha na linalopaswa kuchijiwa. Wamebaki kuwayawaya kwa sababu ni washirika wakuu wa dhambi ya ubaguzi.
Kwa sababu tumeanza, mwendo utakuwa huo wa mikito ya kukita na kukitwa hadi ukamilifu wa dahali. Ni kama vile ilivyokuwa kwa wenzetu waliojita mapema kabla yetu kwa dhambi hii hii ya udini na ubaguzi.
Majuto ni mjukuu, kwa pamoja tunapaswa kujutia dhambi ya ubaguzi tuliyoitenda wakati tukiendelea kuadhibiwa kwa dhambi hiyo ili siku ya hukumu, tuhurumiwe kwa kukikatana wenyewe kwa wenyewe. Wanaodhani adhabu yetu haijafika basi hao hawajakitwa, wakikitwa nao watajikita kuamini jambo hili.
