 |
| Mkurugenzi Mkuu wa Shirika la Nyumba la Taifa (NHC) Nehemiah Kyando Mchechu, akisaini kitabu cha wageni baada ya kufika Makao Makuu ya Shirika la Nyumba Zanzibar (ZNC) kwa ajili ya ziara ya kikazi. Kushoto kwake ni Mkurugenzi Mkuu wa Shirika la Nyumba Zanzibar (ZHC), Mwanaisha Ally na kulia ni Meneja wa Habari na Uhusiano wa NHC, Muungano Saguya |
RIPOTA PANORAMA, ZANZIBAR
0711 46 49 84
MKUGENZI Mkuu wa Shirika la Nyumba la Taifa (NHC), Nehemia Mchechu ameikaribisha Sekta Binafsi kushiriki kuchangia ukuaji wa uchumi wa nchi ili kujenga Tanzania mpya.
Akizungumza jana katika makao makuu ya Shirika la Nyumba Zanzibar (NHZ), muda mfupi baada ya kufanya ziara ya kutembelea makao makuu ya shirika hilo yaliyopo Mji Mkongwe ambayo lengo lake lilikuwa kuimarisha ushirikiano wa mashirika hayo mawili, Mchechu alisema moja ya vipaumbele ya shirika hilo kuanzia Julai, 2022 ni kushirikiana na Sekta Binafsi.
Alisema NHC inakusudia kupata wawekezaji muhimu 200 wenye mitaji isiyopungua Shilingi bilioni tano kila mmoja.
Vipaumbele vingine alivyovitaja ni kuangalia rasilimali za shirika ili zitumike kujiendesha kibiashara na kuongeza idadi ya nyumba kupitia sera ya ubia.
Alisema rasilimali nyumba zitatumika vema kupangisha na kuuza ili kuongeza kipato na kuongeza kasi ya ujenzi wa nyumba mpya ili kuendelea kutimiza lengo la NHC la kuwa kiongozi katika usimamizi na endelezaji wa miliki nchini.
Mkurugenzi Mkuu huyo alisema ili kufikia malengo hayo na kutekeleza vipambele vilivyopo sasa kwa ufanisi, NHC litafanya mabadiliko ya watendaji wake kwa kupanga watu sahihi katika nafasi sahihi ili kuwezesha shirika hilo kufikia matarajio ya Watanzania, Serikali na wadau wa sekta ya nyumba.
 |
| Mkurugenzi Mkuu wa Shirika la Nyumba la Taifa (NHC) Nehemiah Kyando Mchechu alipotembelea nyumba za ZHC zilizopo eneo la Mnadani Darajani, Mji Mkongwe. Kushoto ni Mkurugenzi Mkuu wa Shirika la Nyumba Zanzibar (ZHC) Mwanaisha Ally na maafisa wengine wa ZHC |
“Tutafanya mabadiliko ya ndani kwa kupanga watu sahihi kwenye nafasi sahihi ili kuweza kufanya shirika lifanye vizuri katika nyanja mbalimbali na kufanya mabadiliko ili mambo yaendelee kwa kasi, tuweze kukimbia kwa kasi inayotakiwa na Serikali,” alisema Mchechu.
Alisena rasilimali watu ni suala muhimu ili kubadili au kuleta matokeo chanya ndani ya shirika.
Aidha, Mchechu alisema ili kuungwa mkono na wadau mbalimbali muhimu, Shirika limekuwa likikutana na wadau wa Sekta Binafsi kuwaeleza mpango mkakati wa shirika na mipango mingine ya kuendeleza sekta ya nyumba.
Akimkaribisha Mkurugenzi Mkuu wa NHC, Mkurugenzi Mkuu wa ZHC, Mwanaisha Ali Said alilishukuru NHC kwa kutoa mafunzo mbalimbali kwa watendaji wa ZHC na akiahidi kutembelea tena NHC akiwa na watendaji wake ili kupata mafunzo kutoka kwa wakuu wa vitengo na kujua jinsi ya kuendesha shirika.
“Tunafurahi umerudi tena NHC kwani utatusaidia na tutakuja kuwatembelea huko Bara ili kuweza kupeana ushauri wa namna ya kwenda mbele na kujifunza kupitia mambo makubwa ambayo NHC imeyafanya na hasa jambo letu tunalofanya sasa la kuendeleza eneo la Mji Mkongwe wa Zanzibar ili kukuza utalii,” alisema Mwanaisha.
Kwa upande wake Mchechu aliahidi kuwa NHC itaendelea kushirikiana na ZHC kuwaletea wananchi maendeleo na kusaidia kuleta wawekezaji.
Sanjari na hilo, alilishauri ZHC kujenga nyumba za gharama nafuu na kati na kuruhusu wasiokuwa raia kumiliki nyumba ili kuongeza mtaji nchini na pia kuongeza masoko.
“Juhudi za Rais za kufungua nchi mwelekeo mkubwa itakuwa kuhusisha sekta binafsi hivyo nawashauri Shirika la Nyumba la Zanzibar kukaribisha wawekezaji ili kuendeleza shirika na kuongezea kipato.
Katika kipindi cha miaka mitano ya Rais Samia, NHC imekusudia kujenga nyumba 5,000 za gharama nafuu na kati,” alisema Mchechu
Alisema ili kusaidia suala la makazi hasa baada ya Serikali kuhamia Dodoma, shirika litaendelea kujenga nyumba katika Jiji la Dodoma na hivi sasa litauza nyumba 50 eneo la Medeli, Dodoma ili kupata fedha za kujenga nyumba nyingine 100 katika eneo hilo.
 |
| Watendaji wa Shirika la Nyumba Zanzibar (ZHC) wakimsikiliza Mkurugenzi Mkuu wa Shirika la Nyumba la Taifa (NHC) Nehemiah Kyando Mchechu alipotembelea Makao Makuu ya ZHC yaliyopo Mji Mkonge, Zanzibar |
Awali Mchechu alipata fursa ya kutembelea baadhi ya nyumba kongwe za shirika hilo zinazokarabatiwa katika eneo la Mnadani Mjini Unguja ikiwa ni kazi ya kwanza ya ujenzi kufanywa na shirika hilo tangu kuanzishwa mwaka 2014 kwa sheria ya Baraza la Wawakilishi namba 6.
Mchechu alifanya ziara hiyo ya kikazi baada ya kuhudhuria uzinduzi wa Taasisi ya Mwanamke (Mwanamke Initiatives Foundation-MIF) uliofanywa juzi na Rais Samia Suluhu Hassan.
 |
| Mkurugenzi Mkuu wa Shirika la Nyumba la Taifa (NHC), Nehemiah Kyando Mchechu akikagua nyumba za Shirika la Nyumba Zanzibar (ZHC) zilizopo eneo la Mnadani Darajani, Mji Mkongwe. Mbele yake ni Mkurugenzi Mkuu wa Shirika la Nyumba Zanzibar, Mwanaisha Ally |
